睇鬼片 |《咒》的不合理劇情

又要睇又要驚

「士多啤梨蘋果橙，香蕉菠蘿番石榴」

鬼片之魂

「又要睇，又要驚」應該就係睇鬼片嘅靈魂！

嗰種心態就係想喺電影之中得到懸疑、緊張、刺激、陰森嘅感覺。如果唔怕鬼就無必要睇鬼片，等於唔鹹濕就唔使睇 A 片。睇得，就梗係想有 feel 嘅。

所以，明明細膽底，明知驚，明知俾人嚇兩個鐘，但都走去睇。

不過，我有一個條件：唔會一個人睇鬼片。人多壯膽，輸人唔輸陣！

所以，呢一晚,正值農曆七月，7 男 1 女喺屋企熄晒燈，搬部大電視上飯枱，排好 8 張櫈對住電視排排坐，一齊上 Netflix 睇台灣最近人氣鬼片《咒》。

劇情不合理

半掩面半驚恐咁睇完《咒》，遮面在於怕畫面核突，多過電影氣氛陰森。

老實講，呢套鬼片講到票房咁高，但質素其實好一般，尤其係太多唔合理劇情，令人好出線。（但又話係真人真事改編）

（劇透！劇透！劇透！）

劇情簡介

由女主角李若男第一人稱自己拍攝全片扮紀錄片。

故事講述單親媽媽李若男 6 年前同男友阿東、好友阿原 3 人組成嘅「破鬼特工隊」去一個神秘村落嘅地道探靈，但身邊所有同呢個神秘地道扯上關係嘅人都受邪神詛咒糾纏，除咗李若男本人，所有人都死於非命。

女主角喺戲中用大量自白同觀眾（扮）「互動」- 就係所謂嘅「打破第四面牆」手法，令觀眾一齊唸咒、記住詛咒符號，增加投入感。由於太刻意洗腦式要人記住咒語，為咗令自己唔好被導演牽住走而將咒語入腦，每次女主角叫人唸咒時，我都唸：「士多啤梨蘋果橙，香蕉菠蘿番石榴」。

（港劇《歎息橋》都用好多「打破第四面牆」手法）